कञ्चनपुर प्रकरणमा ‘गम्भीर लापवाही’ गर्ने दुई प्रहरी अधिकारी निलम्बित

काठमाडौं : प्रहरी प्रधान कार्यालयले निर्मला पन्तको बलात्कार तथा हत्या प्रकरणमा दुईजना घटनास्थल अनुसन्धान अधिकृतलाई निलम्बन गरेको छ।

१३ वर्षीया निर्मलाको शवको मुचुल्का उठाउँदा घटनास्थल अनुसन्धानको क्रममा गम्भीर लापरबाही गरेको पाइएकाले प्रहरी नायव निरीक्षक हरसिंह धामी र प्रहरी जवान चाँदनी साउदलाई निलम्बन गरिएको प्रहरी मुख्यालयद्वारा सोमबार जारी विज्ञप्तिमा जनाइएको छ।

प्रहरी जवान चाँदनी साउद सोसल मिडियामा भाइरल भएको भिडियोमा निर्मलाको कपडा पानीमा चोपलेर पखाल्दै गरेको देखिएकी थिइन्।

विज्ञप्तिमा अनुसन्धानमा संलग्न प्रहरी कर्मचारीहरूको भूमिका छानबिन गर्न गठित छानबिन समितिको सिफारिसमा निज प्रहरी अधिकारीहरूलाई प्रहरी नियमावली २०७१ को नियम ११५ को उपनियम ६ (क) र (ग) अनुसार निलम्बन गरिएको उल्लेख छ।

नियमावलीको उक्त नियममा प्रहरी कर्मचारीलाई निलम्बन गर्नु पर्दाको अवस्थाबारे उल्लेख छ। उपनियम ६ क मा ‘निलम्बन नगरी ओहोदाको काम गर्न दिँदा झुट्टा प्रमाण सङ्कलन गर्न सक्ने वा आफू विरुद्धको सवुद प्रमाण गायब वा नष्ट गर्न सक्ने देखिएमा’ भन्ने उल्लेख छ।

यस्तै उपनियम ६ ग मा ‘कुनै प्रहरी कर्मचारीले गरेको कार्यको कारणले निजलाई निलम्बन नगरे सङ्गठन भित्रका कर्मचारीहरूमा नैराश्यता, उत्तेजना आउने वा जनमानसमा नकारात्मक असर पर्न सक्ने वा प्रहरी सङ्गठनकै प्रतिष्ठामा आँच आउने भएमा’ भन्ने उल्लेख छ।

कञ्चनपुरको भीमदत्त नगरपालिका २ उल्टाखामकी निर्मलाको साउन १० गते निम्बुखेडामा बलात्कारपछि हत्या भएको थियो। उक्त प्रकरणमा यसअघि जिल्लाका एसपी डिल्लीराज विष्टसहित पाँचजना निलम्बनमा परिसकेका छन्।

आइतबार गृहमन्त्रालयले सार्वजनिक गरेको छानबिन प्रतिवेदनले प्रहरीमाथि नै छानबिन गर्न सुझाएको छ।

स्रोत http://annapurnapost.com

Leave a Reply

Your email address will not be published. Required fields are marked *